 |
| سبع طرق تقولي لبنتك "لأ" من غير ما تتخانقوا |
سبع طرق تقولي لبنتك "لأ" من غير ما تتخانقوا
بتقولك انتي مبتجيبيليش حاجة أبدا، مع إنك بتلبي معظم طلباتها..
🔥كلمة "لأ" اللي انتي بتقوليها لبنتك بتخليها تشوفك إنك بتعندي معاها و إنك مش عايشة في العالم بتاعها و إنك فيه حاجات كتير متعرفيهاش دلوقتي.. و كمان معناها إنك عايزة تتحكمي و خلاص..
📌📌في البوست ده، هقولك إزاي ترفضي طلبها من غير ما تتخانقوا؟؟..
1. أجلي المناقشة مع تحديد معاد:
قوليلها ممكن نتناقش في الموضوع ده في الويك إند علشان بابا يكون موجود و
نتكلم فيه كلنا؟.. انتي كده بتحسسيها إنه طلبها مهم و انكم هتقعدوا كلكم و
تتناقشوا مناقشة عقلانية و موضوعية و "هادية"..
2. استراتيجية الأسئلة:
بعد ما تطلب طلبها، ابدئي بالأسئلة مش كلمة "لأ".. يعني مثلا بدل ما
تقوليلها "لأ طبعا انتي لسه موبايلك جديد"..، قوليلها "اللي أنا فاهماه انك
عايزة موبايل جديد؟ .. انتي موبايلك فيه مشكلة معينة؟.. يعني انتي عايزة
تجيبي الأحدث؟.. قوليلي الفروقات بينهم؟.. انتي شايفة الفروقات دي و كمان
فرق السعر الكبير يستاهل انك تجيبي موبايل جديد؟.. أكيد أنا نفسي أجيبلك
اللي انتي عايزاه.. لكن فرق السعر الكبير ده هيبقى صعب عليا جدا..
3. فكريها باتفاقاتكم:
بدل ما تقولي "لأ"، فكريها بالتفاق اللي بينكم.. لو طلبت منك إنها تتأخر
عند صاحبتها، قوليلها فاكرة لما قعدنا و اتكلمنا في القصة دي كتير و اتفقنا
إنك ترجعي الساعة 10 و متتأخريش عنها؟.. "احنا اتفقنا و انتي لازم تلتزمي
بالاتفاق زي ما أنا ملتزمة بيه"..
4. التكرار مهم:
لو بتطلب طلب
غير لائق زي إنها تلبس هوت شورت مثلا.. اشرحيلها ليه ده مش صح.. و أكيد
انك شرحتيلها قبل كده كتير، بس التكرار مهم جدا فيما يتعلق بالدين و
الأخلاقيات.. أنا كتبت كذا بوست قبل كده على اللبس،ممكن تستعيني بيهم.. لكن
بدل ما تقولي لأ، اشرحي كتير.. خلي عينها على ربنا و رضاه ، مش كلام
الناس..
5. اعكسي الأدوار:
قوليلها، افرضي انك مكاني دلوقتي و
بنتك بتطلب منك الطلب ده، هتقوليلها إيه؟.. و اقعدوا اتناقشوا مع بعض و
وضحيلها كل الحاجات اللي مش واضحة بالنسبالها.. خلي صوتك دايما محايد و
مفيهوش أحكام عليها..
6. اشرحي:
فهميها الفرق بين ال wants
& needs .. هي أخدت الكلام ده في ابتدائي صحيح، لكن ده وقت تطبيقه..
قوليلها ان الاحتياجات هتلبيها فورا .. لكن ال wants هتلبي منها المتاح
ماديا أو تعمليلها scheduling أو إنها هتيجي في الوقت المناسب..
7. الهدوء مطلوب جدا:
لو بنتك حاولت تضايقك بإنها تتهمك إنك مش بتحبيها أو مش مهتمة بيها طول
عمرك.. خليكي هادية و متقفيش موقف دفاع عن نفسك أبدا.. و لو لقيتي نفسك
هتتنرفزي، قوليلها إنك هتدخلي أوضتك شوية و ترجعيلها..